Gimando ni Tanzanian President Samia Suluhu Hassan karong panahuna nga ang tanang opisyal sa gobyerno kinahanglan mosakay na lang og usa ka bus sa ilang official travel aron maminusan ang konsumo sa gasolina, human sa kakulangon sa suplay tungod sa giyera sa Middle East.
Sumala sa energy regulator sa nasud, misaka ang presyo sa gasolina og dul-an 1/3 sukad sa bulan sa Marso.
Nasayran nga kasagaran, ang entourage sa presidente naglangkob og sobra sa 30 ka sakyanan, lakip na ang mga luxury SUV ug police outriders, nga kasagaran makamugna og grabeng trapiko.
Kahinumduman nga ang kakulang sa lana ang resulta sa pagsira sa Strait of Hormuz sa Iran, diin moagi ang 20% sa lana ug gas sa tibuok kalibutan.
Tungod niini, ubang mga nasud sama sa Ethiopia nagsugod na usab og paghatag og prayoridad sa gasolina alang sa mga sakyanan nga nagdala og importanteng mga produkto ug pampublikong transportasyon.
