Tulo sa matag upat ka Pilipino ang mibutyag nga andam silang mosuporta sa gobyerno sa pagdepensa sa teritoryo sa nasud lakip ang West Philippine Sea, sumala sa survey sa OCTA Research.
Subay sa pinakabag-ong Tugon ng Masa survey, migawas nga 76 porsyento sa mga respondents andam nga manalipod sa teritoryo sa nasud; Pito ka porsyento ang dili mouyon samtang 17 porsyento ang wala pa makadesisyon.
Sa nagkalain-laing rehiyon, labing taas ang suporta sa MIMAROPA nga adunay 93 porsyento, samtang labing ubos sa Central Visayas nga adunay 45 porsyento.
Miabot usab sa 83 porsyento ang agreement rate sa Metro Manila. Migawas usab sa survey nga ang Davao Region adunay pinakataas nga disagreement rate nga 34 porsyento.
Matod sa OCTA, bisan klaro ang halapad nga suporta sa publiko kabahin sa soberanya sa nasud, adunay pipila ka sektor ug rehiyon nga ubos ang commitment sama sa Davao Region, Central Visayas, ingon man sa mga tigulang ug Class E respondents, nga nanginahanglan kuno og mas tutok nga information ug policy engagement.
Ang survey gikomisyon sa Armed Forces of the Philippines o AFP ug gihimo gikan Marso 19 hangtod 25, 2026 pinaagi sa face-to-face interviews sa 1,200 ka respondents.
