Hugot nga gilimod sa kampo ni Sen.Ronald dela Rosa ang pahayag sa National Bureau of Investigation o NBI nga siya kuno “armed and dangerous” samtang nagpadayon ang operasyon sa mga awtoridad kalabot sa gikataho nga arrest warrant gikan sa International Criminal Court o ICC.
Sa usa ka pahayag, gibutyag sa legal counsel ni Dela Rosa nga si Jimmy Bondoc nga walay kamatuoran ang maong paghulagway batok sa senador.
Matod ni Bondoc, ang NBI kuno ang “armed and dangerous” tungod kay armado ang ilang mga operatiba nga nagpatuman sa operasyon alang sa maong warrant nga wala pa kuno mapakita sa kampo sa senador ug wala usab moagi sa lokal nga korte.
Una nang gipahayag ni Dir. Melvin Matibag nga standard protocol lamang sa ahensya ang pagtan-aw nga “armed and dangerous” ang tanang subject sa operasyon o mga indibidwal nga serbisyuhan og warrant isip kabahin sa ilang security precautions.
Gipasabot ni Matibag nga pirmi silang nag-andam sa posibilidad nga armado ang ilang target aron masiguro ang kaluwasan sa mga operatiba atol sa operasyon.
Samtang, padayon nga gikuwestiyon sa kampo ni Dela Rosa ang legalidad sa giingong warrant gikan sa ICC, ilabina ang giingong kakulang sa proseso ubos sa lokal nga hudikatura sa nasud.
Si Dela Rosa usa sa mga personalidad nga giimbestigahan sa ICC kalabot sa war on drugs sa administrasyon ni kanhi Pangulong Rodrigo Duterte.
