DAVAO CITY – Pasakahan na og kaso ang usa ka Macario Burdios Tano, residente sa Purok 2, Barangay Sisimon Laak Compostela Valley human niini gidunggab ang usa ka 21 anyos nga maoy hinungdan sa kamatayon niini.
Kahinumduman nga gideklarang dead on arrival sa hospital ang biktima human nga gidunggab sa 78 anyos nga suspek sulod mismo sa simbahan sa Jesus Miracle Crusade Ministry Church sa Purok 1, Barangay Sisimon sa nahisgutan nga lugar.
Subay sa report sa kapulisan, anaa sa sulod sa simbahan ang biktima gumikan kay miyembro kini sa choir.
Apan kalit nga miabot ang suspek ug diretso nga gidunggab ang biktima sa nagkadaiyang parte sa lawas niini.
Dali pa nga gidala sa ilang mga paryente ang biktima sa ComVal Provincial Hospital sa Laak apan nabugtoan kini sa iyang kinabuhi.
Hinuon dali nga nasikop ang suspek sa mga barangay tanod ug gi-endorso gilayon sa Laak Municipal Police Station.
Narekober sab sa posisyon niini ang .38 revolver nga adunay unom ka mga buhing bala.
Gisubay pa karon sa otoridad kung unsa ang motibo sa suspek sa pagdunggab niini sa biktima.
