Gikumpirma sa Department of Migrant Workers (DMW) nga pito ka Pilipinong tripulante sa usa ka container ship nga niagi sa Strait of Hormuz ang samaran human maigo sa giingong drone attack nga gikonektar sa Iran.
Sumala pa ni DMW Secretary Hans Leo Cacdac, upat sa mga Pilipinong seafarers ang nakaangkon og minor injuries, samtang tulo ang padayon nga ginabantayan tungod sa mas seryosong kadaot nga ilang nakuha sa insidente niadtong Mayo 5. Lakip sa mga tripulante ang crew sa container ship nga San Antonio, usa ka Maltese-flagged vessel.
Giklaro usab sa DMW nga dili French-flagged ang maong barko, supak sa nag-unang report sa pipila ka International Media. Dugang pa niini, giingon sa ahensya nga dayon nga na-evacuate gikan sa barko ang mga Pilipinong tripulante ug karon ginatambalan sa ospital pinaagi sa tabang sa Philippine embassy ug labor attaches sa abroad.
Sa kasamtangan, nagpadayon ang monitoring sa gobyerno sa kahimtang sa rehiyon samtang nagka grabe ang tensyon tali sa Iran ug US-Israel alliance. Nauna na usab nga gi-report nga kapin 1,400 ka Pilipinong seafarers ang luwas nang nakagawas sa Strait of Hormuz.
