DAVAO CITY – Gipasalig sa pamunoan sa Southern Philippines Medical Center (SPMC) nga patas ang ilang pag-tratar sa mga pasyente ilabi na kadtong mipailalom sa pagpa-test sa Coronavirus disease (Covid-19).
Una nang gipanghimakak sa SPMC pinaagi ni Dr. Leopoldo Vega, Chief of Hospital nga aduna sila’y special treatment sa mga pasyente.
Gitataw sa nahisgutan nga tanan nga mga pasyente nga gikatahapang nagpositibo sa Covid-19 ingon man kadtong posibleng natakdan ang ilang ipailalom sa eksaminasyon lakip na kadtong adunay mga travel history.
Kahinumduman nga usa ang SPMC sa mga hospital sa Mindanao nga gisertipikahan sa Research Institute for Tropical Medicine (RITM) nga mamahimong makapahigayon og eksaminasyon sa samples sa mga gikatahapan nga adunay COVID-19 ug dili na kinahanglan pa nga dad-on kini didto sa kaulohan.
