Gikontra ni Senador Risa Hontiveros ang nahimong pamahayag ni Senador Robin Padilla kalabot sa paggamit sa terminong “force majeure” isip basehan aron tugutan ang remote participation sa mga senador sa plenary session sa Senado.
Miinit ang diskusyon kalabot sa gisugyot nga pag bag-o sa Senate rule human nag-walk out ang minority bloc niadtong Mayo 26 tungod sa kuno’y pinaspasan nga pag-apruba sa remote participation o online attendance sa mga senador sa plenaryo.
Mi-eksplikar si Padilla mahitungod sa “force majeure”, ug giingon niini ang nagka lain-laing pangkalibutanong krisis isip mga pananglitan niini.
“War/gera/digmaan sa Gitnang Silangan na nagreresulta na ng terorismo sa iba’t ibang parte ng mundo, ang napipintong pagkakadawit ng Pilipinas sa China-Taiwan conflict. Hindi po ba ito force majeure?” segun ni Padilla.
Gipasabot sab niya nga ang force majeure nagapasabot sa mga panghitabo nga wala ma kontrol sa tao sama sa bagyo, baha, linog, gubat, terorismo, ug uban pang emergency situations.
Gisulti sab sa Senador ang posibilidad sa grabe nga El Niño phenomenon sa ulahing bahin sa 2026 hangot sa unang bahin sa 2027 nga mamahimong makahatag og grabe nga kahulaw sa nasud.
“Malinaw naman po — bagyo, baha, lindol, gera, terrorismo,” dugang pa niya.
Sa katapusa, gipatutsadahan sab ni Padilla ang ilang kauban sa Senado nga, “Akala ko ba pro-active and dating majority?”
Apan sumala kay Hontiveros, dili maisip nga force majeure ang mga sitwasyon ang gipang sulti ni Padilla.
“Naku naman, ano ba naman ‘yan? With all due respect, hindi po ‘yan mga force majeure,” segun ni Hontiveros.
Sumala pa niya, ang mga isyu sama sa giyera sa Middle East, tensiyon sa China ug Taiwan, ug climate change usa ka dugay na ug dili mahimong rason aron magpahigayon og online work ang Senado.
“‘Yan ay kasama sa mga issues na kailangan naming trabahuhin in person,” dugang pa niya.
Gihibugt-ana sab ni Hontiveros nga klaro sa Senate Rules nga tugotan lamang ang videoconferencing sa panahon sa force majeure o national emergency, sama sa nahitabo niadtong COVID-19 pandemic.
Sa pagka karon, wala pay gipagawas nga pahayag o tubag si Padilla kalabot sa nahimong reaksiyon ni Hontiveros.
