Nagpatuman og imbestigasyon ang Office of the Ombudsman kalabot sa giingong pagpanglimbong sa pipila ka Information Technology o IT Systems projects nga gipondohan og bilyon-bilyong piso alang sa mga ahensya sa gobyerno.
Gibutyag mismo ni Assistant Ombudsman Atty. Mico Clavano ang giingong “ghost internet scheme” nga nadiskubre sa Ombudsman, diin gikatahong adunay mga proyekto nga wala matuman o wala ma-deliver sumala sa kontrata bisan pa sa pagbayad sa gobyerno.
Sumala pa ni Clavano, kasagarang ginatutokan sa inspection ang mga hardware sama sa routers ug mga makina, apan dili kanunay maapil sa pagsusi ang mga software nga kabahin sa maong mga proyekto.
Dugang pa niini, mahimong magamit ang maong loophole aron ang usa ka contractor makagamit og mas barato, outdated o peke nga software, apan bug-os gihapon nga singlon ang gobyerno sa kantidad nga gitakda sa kontrata.
Gisusi usab sa Ombudsman ang posibleng overpricing sa mga software tungod sa kakulang sa monitoring sa maong bahin sa mga IT projects.
Lakip sa sentro sa imbestigasyon ang Department of Information and Communications Technology o DICT, diin gustong matino sa Ombudsman kung naglihok ba ug nagsunod sa kontrata ang mga koneksyon ug IT systems nga gi-install sa mga proyekto.
Gitutokan usab sa fact-finding investigation kung reasonable ba ang presyo sa mga software ug hardware nga gigamit ug kung adunay mga proyekto nga gi-overprice.
Dugang pa, gusto usab sa Ombudsman nga matino kung kinsa ang miapruba, nagsertipika ug mitugot sa pagbayad sa mga proyekto bisan pa kung adunay mga bahin nga wala ma-deliver o wala mapatuman.
Sa pagkakaron, wala pa maghatag og komento ang DICT kalabot sa maong isyu.
Samtang, wala usab idetalye ni AO Clavano ang mga partikular nga IT projects nga giimbestigahan tungod kay anaa pa kini sa fact-finding stage.
Sa kasamtangan, padayon ang Ombudsman sa pag-usisa sa mga dokumento ug sirkumstansya nga may kalabotan sa mga proyekto aron matino kung adunay mga iregularidad ug kinsa ang posibleng manubag niini.
