Nagpalig-on sa koordinasyon ang Police Regional Office 11 o PRO 11 ug Commission on Audit o COA XI pinaagi sa pag-inaugurate sa bag-ong Resident COA Building sulod sa Camp Sgt. Quintin M. Merecido sa Buhangin, Davao City.
Giseremonyahan ang bag-ong pasilidad nga gitambongan sa mga opisyal sa PRO 11 ug COA XI isip kabahin sa ilang paningkamot nga mas mapalambo ang pagmonitor sa paggamit sa pondo sa gobyerno.
Girepresentahan ni PCOL Harry B. Domingo si PRO 11 Regional Director PBGEN Leon Victor Z. Rosete atol sa maong kalihokan.Gipasabot ni Atty. Fahad D. Mangacop sa COA XI nga makatabang ang bag-ong building aron mas hapsay ug mas episyente ang trabaho sa mga COA personnel nga nagmonitor sa hustong paggamit sa pondo sa gobyerno.
Gilauman nga mas mapadali usab pinaagi sa maong pasilidad ang koordinasyon tali sa duha ka ahensya, ilabina sa mga buluhaton nga may kalabotan sa pag-audit ug pagmonitor sa mga transaksyon ug pondo sa PRO 11.Gipunting usab nga kabahin kini sa mga lakang aron mapalambo ang transparency, accountability ug maayong pagdumala sa serbisyo publiko.
Sa pagkakaron, padayon ang PRO 11 ug COA XI sa pagpalig-on sa ilang koordinasyon aron masiguro ang husto ug responsable nga paggamit sa pondo sa gobyerno.
