Muatubang si Davao City Mayor Sebastian “Baste” Duterte sa Impeachment Court aron motubag sa mga pangutana bahin sa mga transaksyon sa Davao City government ug Gencorp Industries Inc., usa ka kompanya nga ideklarar ni Vice President Sara Duterte nga adunay iyang pinansyal nga interes.
Gimando sa Senate Impeachment Court si Baste nga magdala og mga rekord sa mga transaksyon tali sa Davao City government ug Gencorp Industries Inc. gikan sa 2020 hangtod sa kasamtangan.
Sumala sa House prosecutors, apil ang Gencorp sa mga kompanya nga ideklarar ni VP Sara nga adunay iyang pinansyal nga interes sa iyang Statements of Assets, Liabilities and Net Worth o SALN.
Gisusi sa prosecution kung adunay mga transaksyon tali sa Gencorp ug Davao City government samtang mayor si Baste, lakip kung giunsa kini pagproseso ug pagpatuman.
Giplano usab sa House prosecution nga hangyoon ang Impeachment Court nga ideklarang hostile witness si Baste. Kung aprobahan, mahimong mogamit ang prosecution og mas direktang mga pangutana atol sa iyang testimonya, apan ang pinal nga desisyon anaa gihapon sa Impeachment Court.
Kabahin kini sa Article II sa impeachment case batok kang VP Sara, nga nag-akusar kaniya nga wala niya gibiyaan ang iyang mga interes sa negosyo ug nagpadayon sa pag-apil sa mga kalihokan sa negosyo samtang bise presidente.
