Nagpasidaan ang Department of Agriculture (DA) kalabutan sa posibleng dako nga pagkunhod sa produksyon sa bugas sa nasud, nga mahimong moabot og 20 hangtod 50 porsyento kung dili dayon molihok ang gobyerno.
Sumala sa DA, hinungdan niini ang padayon nga pagsaka sa presyo sa abono tungod sa giyera sa Middle East, nga nagresulta sa mas mahal nga gasto sa produksyon ug posibleng makaapekto sa pagpananom sa umaabot nga mga bulan.
Atol sa pagdungog sa Senate Committee on Agriculture, Food and Agrarian Reform kagahapong adlawa, gibutyag ni Agriculture Undersecretary Asis Perez nga nameligro ang mga tanom nga itanom sa Mayo ug Hunyo tungod sa kakulang sa barato nga inputs, ug gibutyag niini ang hinanaling panginahanglan sa suporta alang sa mga mag-uuma.
Sa pagbana-bana sa DA, posibleng mawad-an og 2 milyones ka metric tons sa bugas o 20% sa produksyon, samtang sa labing grabe nga senaryo, mahimong moabot sa 50% ang pagkunhod usa ka seryosong hulga sa food security sa nasud.
Gihagit usab ni Sen. Francis Pangilinan ang gobyerno ug pribadong sektor nga mangandam sa posibleng “food shock” tungod sa padayon nga pagsaka sa presyo sa lana nga nakaapekto sa agrikultura ug pagpangisda.
