Naglusad ang militar sa United States og bag-ong mga pag-atake sa habagatang bahin sa Iran. Target sa mga strike ang mga Iranian missile sites ug mga sakayan nga giingong nagsulay sa pagbutang og mga mina sa dagat.
Sa opisyal nga pahayag sa United States Central Command o CENTCOM, giingong gihimo ang mga pag-atake isip depensa sa kaugalingon ug aron maprotektahan ang ilahang mga sundalo batok sa mga hulga gikan sa pwersa sa Iran.
Matud ni Capt. Tim Hawkins, spokesperson sa Central Command, padayon nga depensahan sa militar sa US ang ilang mga tropa samtang ginapadayon ang pagpugong sa tensyon taliwala sa naglungtad nga ceasefire.
Gipasabot usab sa opisyal nga gitarget sa mga strike ang mga lugar duol sa Bandar Abbas, usa ka port city sa habagatang Iran diin nahimutang ang dakong naval base sa Strait of Hormuz.
Sa pagkakaron, wala pay opisyal nga tubag gikan sa gobyerno sa Iran kalabot sa insidente, ug wala pa klaro kung unsang epekto niini sa kasamtangang peace agreement sa duha ka nasud.
Niaging weekend, gipadayag ni Trump nga duol na maabot ang usa ka kasabutan, apan sa ulahi miingon siya nga gimandoan niya ang mga negotiators nga dili dalion ang proseso.
