Napugos sa pag-withdraw si Sen.Imee Marcos sa iyang gipakitang video presentation atol sa plenary session sa Senate of the Philippines kagahapong adlawa, kalabot sa giingong plano sa Charter Change nga konektado sa eleksyon 2028.
Sa maong sesyon, gipakita ni Marcos ang video nga adunay mga alegasyon batok sa pipila ka mga kaubang senador nga kuno nagduso sa Cha-Cha aron dili matuman ang eleksyon sa 2028.
Apan gilayon kining gisupak sa mga miyembro sa minority bloc ug gitawag nga “fake news” ug malisyosong presentasyon.
Mipakita usab og kusog nga kasupakan si Sen. Migz Zubiri ug mibutyag nga dili angay ilakip ang ubang mga senador sa maong mga alegasyon.
Human sa tensyonadong panaglalis sa sesyon, gi-withdraw ni Marcos ang maong materyal ug miingon nga nasakitan siya sa reaksyon sa iyang mga kaubang magbabalaod.
Bisan paman niini, gipadayon gihapon sa senadora ang iyang panawagan nga siguruhon nga walay mahitabo nga term extension ug matuman ang eleksyon 2028.
Miuyon usab si Zubiri ug miingon nga tanang senador gusto nga madayon ang eleksyon sa 2028.
