Gikumpirma sa mga awtoridad nga dili moubos sa 90 ka mga tawo ang nakabsan sa kinabuhi human sa usa ka gas explosion sa coal mine sa Shanxi Province.
Subay sa report, nahitabo ang insidente niadtong Biyernes sa gabii sa Liushenyu coal mine sa Changzhi. Sa pinakaulahi nga briefing sa mga opisyal, gikumpirma nga 90 ang namatay, kapin 120 ang naospital, samtang duha pa ka indibidwal ang padayon nga gipangita ug gituohang wala nay kinabuhi.
Gihulagway sa mga awtoridad nga “chaotic” ang sitwasyon human sa pagbuto, samtang nagpadayon ang imbestigasyon sa hinungdan sa insidente.
Matud sa mga opisyal, adunay nadiskobrehang “serious violations” sa operasyon sa minahan, apan wala pa gipagawas ang kumpletong detalye sa mga paglapas.
Liboan usab ka rescuers ug medical personnel ang gilayon nga gipadala sa lugar aron motabang sa search and rescue operations. Daghan sa mga nasamdan ang naapektuhan sa makahilong gas, sumala sa state broadcaster.
Samtang kabahin niini, gimandoan ni Xi Jinping ang gilayon nga rescue operations alang sa mga nawagtang ug nanawagan og lawom nga imbestigasyon aron mapanubag ang mga responsable sa usa sa pinakagrabeng mining disasters sa China sulod sa kapin 15 ka tuig.
Mitumaw usab sa mga report nga adunay mga paglapas sa safety protocols sa coal mine, lakip na ang giingong kakulang sa mandatory tracking devices alang sa mga trabahante ug dili tugma nga mining blueprints nga gisumite sa mga awtoridad.
