Gipunting sa International Criminal Court (ICC) Registry nga padayon nilang ginamonitor ang kondisyon ug lihok ni kanhing Pangulong Rodrigo Roa Duterte samtang anaa sa detention facility sa The Hague tungod sa iyang edad ug pipila ka gihambin nga balati-an.
Subay sa pito ka panid nga dokumento niadtong Mayo 20, giingon sa ICC Registry nga giila si Duterte isip detainee nga adunay taas nga posibilidad nga matumba, apan wala pa hinooy na-record nga insidente niini sulod sa milabay nga 30 ka adlaw.
Dugang pa, wala usab gipadayag sa ICC ang detalye sa iyang mga chronic condition tungod sa confidentiality sa iyang medical records.
Sumala pa sa ICC Registry, sa pipila ka higayon nga mawad-an siya og balanse, gilayon siyang gitabangan sa detention staff ug gisusi dayon sa medical team.
Lakip sa gihimong lakang, adunay mga pagbag-o nga gihimo sa iyang selda ug visiting rooms aron masiguro ang iyang kaluwasan ug kalinaw sa iyang paglihok sulod sa detention facility.
Sa kasamtangan, gipadayag sa ICC nga padayon ang medical care nga gihatag kang Duterte samtang nag-atubang siya sa kasong crimes against humanity may kalabotan sa war on drugs sa panahon nga mayor pa siya sa Davao City hangtod sa iyang pagkapangulo sa nasud.
