Gipalagan sa Department of National Defense (DND) ang padayon nga pag-angkon sa China sa mga maritime feature sa Pilipinas sa West Philippine Sea (WPS), lakip na ang Pag-asa ug Lawak Islands. Sumala pa sa opisyal nga gipahayag sa DND, kabahin sa Kalayaan Island Group ang maong mga isla ug opisyal nga gimandoan sa Pilipinas ubos sa Munisipalidad sa Kalayaan sa probinsya sa Palawan.
Dugang pa niini, giingon ni Defense Spokesperson Assistant Secretary Arsenio Andolong nga lehitimo ang paggamit sa awtoridad sa Pilipinas sa maong mga lugar, lakip na ang mga proyekto alang sa improvement ug development aron masiguro ang kaluwasan, kaayohan ug panginabuhi sa mga Pilipinong nagpuyo ug nagtrabaho didto.
Lakip sa gihisgutan, tubag kini sa DND human nagpahayag og pagsupak si Chinese Defense Spokesperson Jiang Bin sa construction activities sa Pilipinas sa maong mga isla. Giingon pa ni Jiang nga iligal kuno nga giokupar sa Pilipinas ang mga lugar ug giangkon nga adunay “indisputable sovereignty” ang China sa gitawag nilang Nansha Islands o Spratly Islands.
Sa kasamtangan, gipanghimakak sa DND ang maong mga alegasyon ug gipasiugda nga legal ang tanang aktibidad ug infrastructure development nga ginapahigayon sa Pilipinas sa Pag-asa ug Lawak Islands.
