DAVAO CITY – Gibutyag ni PLtCol Jay Dema-Ala, Acting Chief of Police sa Tagum PNP nga wala silay nakitang foul play sa kamatayon sa usa ka 29 anyos nga lalaki nga nakaplagan na lamang nga walay kinabuhi samtang naghigda sa bus terminal sa Tagum City kagahapong adlawa.
Sa inisyal nga imbestigasyon sa otoridad, naila ang biktima nga si Bobby Berallo Centinales, residente sa Brgy. Calumpang, General Santos City.
Sumala pa kang PLTCol Dema-Ala, nga kauban sa biktima ang usa ka Jenalyn Boston Taer diin saysay niini, pauli na ang biktima sa ilang lugar arun patambalan ang gihambin niini nga ulcer.
Samtang nagpa-abot sumala pa kini ug bus nakatulog ang biktima ug wala na kini nakamata. Gikatakda na nga dad-on ang patay’ng lawas sa biktima paingon sa pinuy-anan niini sa Gen. San.
