Giabi-abi sa 10th Infantry Division o 10ID ang advance party sa Malaysian Army alang sa duha ka adlaw nga preparatory activity kalabot sa umaabot nga Malaysian-Philippine Army Training Activity LAND MALPHI 24/2026 sa Camp General Manuel T. Yan Sr. niadtong Mayo 12 hangtod 13, 2026.
Ang delegasyon sa Malaysia gipangulohan ni Wazir Syafiq Bin Nodin, Commanding Officer sa 6th Royal Malay Regiment, nga mibisita pinaagi sa courtesy call kang Major. Gen.Alvin Luzon, Commander sa 10ID, isip kabahin sa koordinasyon ug pagplano alang sa bilateral military engagement nga gikatakdang ipahigayon sunod bulan sa Headquarters 10ID.
Atol sa kalihokan, ang advance party sa Malaysian Army uban sa tabang sa personnel sa 10ID nagpahigayon og reconnaissance ug site survey sa mga training facilities, billeting areas, conference venues, ug uban pang importanteng lugar aron masiguro ang hapsay ug epektibong pagpahigayon sa exercise.
Nagpahigayon usab ang duha ka grupo og coordination meetings ug planning sessions isip pagpangandam sa sunod-sunod nga combined training engagements ubos sa exercise framework.
Ang LAND MALPHI 24/2026 usa ka tinuig nga bilateral training engagement nga puli-pulihang gi-host sa Philippine Army ug Malaysian Army nga nagtumong sa pagpalig-on sa defense cooperation ug interoperability sa duha ka kasundalohan sa territorial defense ug counter-insurgency warfare operations.
Ang main exercise nga himuon sunod bulan maglakip sa Subject Matter Expert Exchanges o SMEE, cross-training activities, table-top exercises, staff exercises, ug command post exercises nga naka-focus sa combined arms operations ug battle staff planning.
Gilauman usab nga mapalambo niini ang operational coordination, mutual understanding, ug mission effectiveness sa mga partisipanteng pwersa.
Gikanayon ni Major General Luzon ang importansya sa padayon nga military-to-military engagements aron mapalambo ang regional security cooperation ug mapalig-on ang propesyonal nga relasyon militar tali sa partner nations.
Matod ni Luzon, ang maong preparatory engagements makatabang sa duha ka kasundalohan sa paghimo og epektibong coordination mechanisms ug pagsiguro sa malampusong pagpahigayon sa LAND MALPHI 24/2026, samtang nagpalig-on usab sa interoperability, pagsalig sa usag usa, ug lig-ong partnership sa pagtubag sa parehas nga security challenges.
Gipadayag usab sa 10ID nga magpabilin silang komitado sa pagpalambo sa makahuluganon nga international military engagements nga nagdasig sa operational excellence, professional collaboration, ug malungtarong defense cooperation tali sa allied armed forces.
