Nakaalerto na ang Philippine National Police alang sa duha ka adlaw nga transport strike sa MANIBELA karong Septiyembre 14 hangtod 15, isip protesta sa padayon nga pagsaka sa presyo sa lana.
Sumala pa ni PNP chief General Jose Melencio Nartatez Jr., gipataas na ang alert status sa mga police unit sa mga lugar nga gilaumang tiguman sa mga protesters, lakip ang Philcoa sa Quezon City.
Dugang pa niini, gimandoan ang mga police chiefs ug territorial units nga makigkoordinar sa mga lokal nga panggamhanan ug ubang ahensya aron mapadayon ang seguridad ug hapsay nga crowd management.
Nag-andam usab ang PNP og koordinasyon alang sa pagtabang sa mga commuter nga posibleng ma-stranded tungod sa tigil-pasada.
Matud pa ni Nartatez, nasabtan sa kapulisan ang reklamo sa transport groups tungod kay apektado usab sa pagsaka sa fuel prices ang ilang mga tauhan nga nagmaneho.
Sa pagkakaron, gipaabot sa PNP nga magpabiling malinawon ug hapsay ang mga protesta, apan naka-standby gihapon ang dugang nga security forces kung adunay emerhensya o ubang insidente.
Padayon usab ang monitoring sa mga protest areas samtang ginabantayan sa kapulisan ang kahimtang sa trapiko ug kaluwasan sa publiko.
