Patay ang tulo ka indibidwal samtang labing menos 15 ang nasamdan human sa shooting incident duol sa polling center sa Barangay Bagua 2, Cotabato City, pipila ka oras sa wala pa magsugod ang unang BARMM Parliamentary Elections karong adlawa, Septyiembre 14, 2026.
Sumala pa kang Police Regional Office-Bangsamoro spokesperson Captain Steffi Salanguit, nahitabo ang pagpamusil alas 11:40 hangtod 11:55 kagabii atubangan sa Datu Usman Mampen Elementary School.
Giila ang usa sa mga namatay nga 88-anyos nga si Edar Kasan Andog, samtang wala pa mailhi ang duha ka uban pang fatalities.
Dugang pa niini, gidala sa duol nga mga ospital ang 15 ka nasamdan aron matambalan.
Base sa inisyal nga imbestigasyon, nagtapok ug sayo nga nagpila ang mga tawo sa polling center sa dihang adunay pagdinusoay nga misangpot sa init nga panaglalis ug pagpamusil.
Nakarekober ang kapulisan og empty shells nga gituohang gikan sa .45-caliber ug 9mm pistols.
Miresponde sa lugar ang Cotabato City police ug ubang security units, samtang padayon ang Scene of the Crime Operations sa pagproseso sa crime scene.
Sa pagkakaron, wala pa matino ang mga suspek samtang gipadayon ang imbestigasyon sa motibo ug tibuok sirkumstansya sa insidente.
