Posibleng moubos ngadto sa 13 ka boto ang gikinahanglang conviction threshold sa impeachment trial ni Vice President Sara Duterte kung 20 lamang ka senator-judges ang legal ug aktuwal nga makalahok sa final voting.
Kini ang interpretasyon ni lawyer ug law professor Howard Calleja sa constitutional requirement nga nagkinahanglan og concurrence sa two-thirds sa tanang miyembro sa Senado alang sa conviction.
Sumala pa ni Calleja, dili pirming 16 o 24 ang basihan sa computation tungod kay mahimong mausab ang denominator depende sa gidaghanon sa mga senador nga makahimo sa ilang katungdanan isip senator-judges.
Kung 21 lamang ang makalahok, kinahanglan pa matino kung 13 o 14 ka boto ang katumbas sa two-thirds. Kung 20 naman, iyang gibanabana nga 13 ka boto ang mahimong igo alang sa conviction.
Apan sa pagkakaron, nagpabilin sa 16 ka boto ang threshold base sa naunang ruling sa presiding officer sa Impeachment Court ug mao usab kini ang posisyon sa House prosecution.
Sa Septiyembre 16,2026 paminawon sa Impeachment Court ang opinyon sa mga legal experts ug retired justices isip amici curiae sa dili pa hisgutan ang maong isyu ug ang oral arguments sa Septiyembre 23.
