Mikunhod ang net inflow sa foreign direct investments o FDI sa Pilipinas sa unang unom ka bulan sa tuig tungod sa market volatility ug kabalaka sa kusog sa economic growth sa nasud.
Base sa pinakabag-ong datos sa Bangko Sentral ng Pilipinas o BSP, miabot sa $3.4 bilyon ang net FDI inflow gikan Enero hangtod Hunyo, nga mikunhod og halos 18% kumpara sa parehas nga period sa miaging tuig.
Ang maong kantidad katugbang sa hapit 49% sa giusab nga full-year projection sa BSP nga $7 bilyon. Kaniadtong Hunyo lamang, miabot sa $447 milyon ang net inflow, pinakagamay sulod sa duha ka bulan.
Dako nga bahin sa pagkunhod gikan sa intercompany borrowings sa multinational companies ug ilang Philippine subsidiaries, nga mikunhod og halos 26% ngadto sa $2.1 bilyon.
Miubos usab og 19 porsyento ngadto sa $829 milyon ang reinvestment of earnings.
Apan misaka og 59.4 porsyento ngadto sa $489 milyon ang net equity inflow.
Matod sa ekonomista nga si Leonardo Lanzona, global market volatility, taas nga US interest rates, peso depreciation ug epekto sa graft scandal nagpadayon sa pagpahinay sa foreign investment sa Pilipinas.
