Gipahayag ni Presidente Ferdinand Marcos Jr. nga nalipay siya sa desisyon sa Supreme Court nga pagbasura sa graft conviction batok sa iyang inahan nga si kanhi First Lady Imelda Marcos.
Matud pa sa Presidente, dugay nang nakabinbin ang mga kaso nga gisang-at pa kaniadtong 1986 ug kapin upat ka dekada na kining palas-anon sa ilang pamilya. Giingon niya, “I’m glad, especially for my mother,” tungod kay dili na kini kabalak-an sa kanhi First Lady.
Pagpaklaro usab ni Marcos nga walay kalabotan ang Supreme Court ruling sa iyang pagpili sa sunod nga Chief Justice ug wala kini kabahin sa konsiderasyon sa appointment process.
Kahinumdoman nga gi-bali sa Supreme Court ang 2018 Sandiganbayan conviction ni Imelda Marcos sa pito ka counts sa graft nga adunay kalabotan sa iyang giingong financial interests sa pipila ka Swiss foundations, human matino sa Korte nga wala mapamatud-i sa prosecution ang iyang sala beyond reasonable doubt.
Gipasiugda sa Palasyo nga respetuhon sa administrasyon ang desisyon sa Korte Suprema ug bulag kini sa proseso sa pagpili sa bag-ong Chief Justice.
Sa pagkakaron, padayon ang appointment process samtang gipanghimakak ni Marcos ang spekulasyon nga adunay koneksyon ang duha ka isyu.
