Mipahayag si US President Donald Trump og pagsalig nga matapos ra ang gubat tali sa Estados Unidos ug Iran, ug uban niinigilauman nga moubos usab ang presyo sa petrolyo sa international market.
Posible nga mahitabo ang pagtapos sa maong panagbangi sa dili pa matapos ang midterm elections sa bulan sa Nobyembre.
Dugang pa sa Presidente nga bisan wala pa siyay nakitang pormal nga kasabutan tali sa Estados Unidos ug Iran, posible gihapon nga mosulod sa negosasyon ang duha ka panig aron masulbad ang tensyon.
Kahinumdoman nga mibalik ang tensyon tali sa Washington ug Tehran human sa mga insidente sa Strait of Hormuz, diin giingong gibabagan sa Iran ang pipila ka barko nga naglawig sa maong importanteng agianan sa oil shipments.
Samtang, anaa sa $96.05 kada barrel ang WTI crude, $101.70 ang Brent crude ug $107.50 ang OPEC Basket.
Sa exchange rate nga ₱62.49 kada US dollar, katugbang kini sa gibana-banang ₱6,001.91 kada barrel sa WTI, ₱6,354.73 sa Brent ug ₱6,717.16 sa OPEC Basket.
Gipasiugda ni Trump nga gusto niyang makita ang pagbalik sa normal nga kahimtang sa rehiyon ug pagkunhod sa pressure sa global energy prices.
