Gi-aprobahan sa Senate Committee on Foreign Relations ang Philippines-France Status of Visiting Forces Agreement o SOVFA, nga maghatag og legal framework alang sa presensya ug mga kalihokan sa visiting Filipino ug French defense personnel sa matag teritoryo.
Matod ni Defense Secretary Gilberto Teodoro Jr., kinahanglan palapdan sa Pilipinas ang defense partnerships tungod sa pressure sa teritoryo sa nasud gikan sa China.
Pagpasabot ni Teodoro nga mas daghang defense partners ang makatabang sa pagpalig-on sa deterrence posture sa Pilipinas.
Ang maong kasabutan, maoy unang visiting forces agreement sa Pilipinas uban sa usa ka European country, giaprobahan sa komite nga gipangulohan ni Senator Juan Miguel Zubiri ug ipasa na ngadto sa plenary.
Dugang pa niini, gihulagway ni Teodoro ang France isip strategic partner tungod kay adunay kini mga teritoryo sa Pacific, lakip ang New Caledonia ug French Polynesia.
Gikutlo usab niya ang suporta sa France sa 2016 arbitral award sa South China Sea ug sa freedom of navigation ug international law.
Samtang, gipaabot ni Teodoro nga magpadayon ang mas assertive nga lihok sa China sa West Philippine Sea, busa kinahanglan usab usbon sa Pilipinas ug mga partner niini ang paagi sa pagtubag.
