Nanawagan ang Department of Foreign Affairs o DFA sa China nga undangon na ang ilang pag-angkon ug presensya sa Panganiban ug Subi Reefs sa West Philippine Sea nga giingong sakop sa Philippine Exclusive Economic Zone o EEZ.
Matud sa DFA, klaro nga kabahin sa hurisdiksyon sa Pilipinas ang maong mga lugar subay sa United Nations Convention on the Law of the Sea o UNCLOS ug sa 2016 Arbitral Award.
Gipasiugda sa ahensya nga ang pagtukod og mga artipisyal nga isla sa China giisip nga paglapas sa Philippine Maritime Zones Act ug internasyonal nga balaod sa kadagatan.
Ang maong pahayag sa DFA nahitabo human giingong nagpagawas og mga flares ang People’s Liberation Army o PLA batok sa eroplano sa Philippine Coast Guard atol sa maritime domain awareness flight.
Sumala pa nga gihimo sa Chinese forces ang radio challenge ngadto sa eroplano sa Pilipinas samtang nag-operate kini duol sa Panganiban ug Zamora Reefs sa wala pa kini mitugpa sa Pag-asa Island.
Gipasalig sa DFA nga ipadayon sa Pilipinas ang paggamit sa diplomatikong pamaagi aron panalipdan ang iyang mga katungod ug interes sa West Philippine Sea.
