DAVAO CITY – Gipangunahan ni Pangulong Rodrigo Duterte ang pang-apud-apod sa mga Certificate of Land Ownership Award (CLOA) alang sa mga Agrarian Reform Beneficiaries (ARBs) karong adlawa nga gipahigayon sa Davao City Recreation Center.
Ang Mindanao-wide Turnover and Distribution sa Certificates of Land Ownership Award o CLOA ngadto sa mga Agrarian Reform Beneficiaries maoy pinakaunang ceremonial turnover sa 58,387 ka mga CLOA sa Land Bank of the Philippines ngadto sa Department of Agrarian Reform diin 60,233 ka mga agrarian reform beneficiaries gikan sa lima ka rehiyon sa Mindanao ang nakadawat sa maong mga titulo sa yuta kung diin mukabat kini sa 102,727 ka ektarya.
Gipahigayon sab ang ceremonial distribution sa 1,361 ka mga CLOA ngadto sa 1,709 ka mga agrarian reform beneficiaries sa rehiyon sa Dabaw nga adunay 1,452 ka ektarya sa yuta nga gipang-apud-apod kanila.
Ang nahisgutang mga CLOA gikan kini sa 182 hectares nga mga private agricultural lands nga nakuha sa ulahing mga bulan niadtong tuig 2018 ug sayo nga mga bulan niining kasamtangang tuig ug 1,179 ektarya sab gikan sa mga partitioned CLOAs.
Ang pag-apud-apod sa maong mga titulo ngadto sa mga farmer beneficiaries mao ang usa sa mga lakang aron nga makumpleto ang implementasyon sa Comprehensive Agrarian Reform Program (CARP). Pinaagi niini, masiguro gayud ang pagpanag-iya sa mga ARBs ngadto sa luna nga gihatag alang kanila.
Anaa sa 2,000 ka mga ARB representatives gikan sa lima ka rehiyon sa Mindanao ang mitambong sa maong aktibidades lakip na sab ang mga opisyal ug personahe gikan sa Department of Agrarian Reform (DAR), Department of Agriculture (DA), Land Bank of the Philippines (LBP) ug pipila ka mga partner agencies sama sa Department of Social Welfare and Development (DSWD), Department of Environment and Natural Resources (DENR) ug Register of Deeds.
