Gikumpirma ni Senador Raffy Tulfo nga wala siyay planong modagan isip pangulo sa 2028, bisan pa sa halos tabla niining rating sa mga survey batok ni Vice President Sara Duterte.
Sa usa ka interbyu, nagpasalamat si Tulfo sa padayon nga pagsalig sa publiko apan gipaklaro niini nga mas gusto niya ipadayon ang iyang trabaho isip senador.
Gikanayon niini nga wala pa siyay plano modagan pagka-presidente sa 2028. Hinuon, gikumpirma sa senador nga modagan siya pag-usab alang sa re-election sa Senado.
Sumala pa kaniya, kontento siya sa iyang karon nga posisyon ug nagtuo nga mas daghan pa siyang mahimo isip magbabalaod.
Dugang pa niya, mas bug-at usab ang responsibilidad sa pagka-presidente, nga adunay kauban nga mas daghang “sakit sa ulo,” maong wala niya kini tinguhaa sa karon.
