Nagpahigayon ang Philippine Coast Guard (PCG) og Maritime Domain Awareness (MDA) flight kagahapong adlawa aron nga hagiton ang mga nasiplatang barko ug aktibidad sa China sa bahin sa Kalayaan Island Group.
Matod kang PCG spokesperson para sa West Philippine Sea Rear Adm. Jay Tarriela, nakita sa flight sa Islander 4177 ang Chinese oceanographic research vessel nga Xiang Yang Hong 33 sa gilay-on nga 7.34 nautical miles sa kasadpan sa Rozul Reef.
Gibutyag nga nagpakatag kini og service boats paingon sa maong bahura, nga nagpasabot sa giingong unauthorized Marine Scientific Research (MSR) operations.
Dugang pa ni Tarriela, sa maong lugar nasiplatan usab ang usa ka barko sa China Coast Guard, samtang adunay 13 ka Chinese Maritime Militia vessels (CMMVs) nga nakadunggo sa palibot sa katubigan.
Sa iyang post, gipasabot niini nga subay sa Dark Vessel Detection (DVD) system sa Canada, migikan ang Xiang Yang Hong 33 sa China niadtong April 15.
Dayon, gikanayon nga nagpatuman kini og survey activities sa lain-laing lugar sulod sa Philippine exclusive economic zone. Nakita usab kini sa Ayungin Shoal gikan Abril 20 hangtod 22, uban ang mga support vessels.
Nakita usab ang Chinese vessel sa Panganiban Reef gikan Mayo 1 hangtod Mayo 3, ug nag-operate sa Quirino Atoll ug Rozul Reef sugod Mayo 3 hangtod niadtong Mayo 6. Hangtod kagahapon, na-track usab ang barko gikan sa Jacinto Reef padulong sa Diego Silang Reef.
Sa susamang Maritime Domain Awareness (MDA) flight, na-monitor sa Philippine Coast Guard ang 28 ka Chinese Maritime Militia vessels sa palibot sa Cay 1 ug Cay 2.
Sa katapusan, gipasalig ni PCG Commandant Admiral Ronnie Gil Gavan nga magpabilin nga lig-on ang PCG sa pagtuman sa ilang mandato sa pagbantay ug pagpanalipod sa maritime domain sa Philippines.
Ipadayon usab nila ang MDA operations ug ang pag-challenge sa mga giingong ilegal nga kalihokan nga naglapas sa soberanya ug katungod sa nasud.
