Gikabutyag nga nagpadayon lamang gihapon ang operasyon sa online sabong bisan paman nga gidili kini sa nakalabay nga administrasyon.
Giangkon kini ni Philippine Amusement and Gaming Corporation (PAGCOR) Chairman ug CEO Alejandro Tengco sa pagdungog sa Senado sa dihang gipangutana kini kung adunay plano ang PAGCOR nga buhi-on ang e-sabong.
Tubag sa opisyal nga wala pa kini nila ginatun-an karong panahuna.
Gipahayag pa niini nga ang problema, wala na-regulate ang online sabong ug walay nakuha bisan centavo ang gobyerno.
Kaniadtong ang PAGCOR pa ang nag-regulate sa e-book sabong nakatigom ug halos mukabat sa P6.5 bilyon nga bayad sa lisensya niadtong 2021.
Kaniadtong Mayo 2022, gimando ni kanhi Pangulong Rodrigo Duterte nga ihunong ang mga operasyon sa e-sabong gumikan sa dili maayong epekto niini sa katawhan.
Nahimong kontrobersyal usab kini niadtong 2022 gumikan sa pagkahanaw sa ubay-ubay nga mga sabungero ug uban pang nalambigit sa nahisgutang kalihukan.
Wala pa usab nasulbad ang nahisgutang kaso duha katuig na ang nakalabay.
