Buo gihapon ang pagsalig sa White House sa United States Secret Service aron bantayan ang seguridad ni US Pres. Donald Trump human sa insidente sa pagpamusil sa usa ka hotel sa Washington, D.C. niadtong Sabado (Domingo sa Pilipinas).
Sumala sa usa ka opisyal sa White House, nagtuo ang Presidente nga epektibo ang aksyon sa mga Secret Service agent human nila mapugngan ang suspek.
Dungan niini, maghimo usab og makuti nga pagrepaso sa security protocols aron malikayan ang susamang hitabo sa umaabot. Kahinumduman nga nahitabo ang insidente duol sa security checkpoint sa lobby sa hotel, diin gihimo ang usa ka event nga may kalabotan sa White House Correspondents’ Dinner.
Sumala sa mga awtoridad, ang suspek nailhang si Cole Tomas Allen, 31 anyos gikan California, nga nadakpan human kuno mipusil sa lugar. Nakatakda siyang moatubang sa korte alang sa daghang kaso nga gisang-at batok kaniya.
Nahibaloan nga si Allen usa ka self-described nga “game developer and teacher,” apan padayon pa nga gisusi sa mga imbestigador ang iyang motibo ug uban pang detalye.
Samtang, miingon si Kash Patel, direktor sa Federal Bureau of Investigation, nga andam ang FBI sa pagtabang kung ipahigayon pag-usab ang White House Correspondents’ Dinner sulod sa mosunod nga 30 ka adlaw, bisan wala pa’y pinal nga anunsyo.
Gisugyot usab ni Trump nga posible nga ma-reset ang event sa dali nga panahon, apan gipatin-aw sa mga opisyal nga wala pa’y opisyal nga iskedyul ug padayon pa kini nga gitun-an tungod sa mga isyung pangseguridad.
Sa usa ka interbyu human sa insidente, miingon si Trump nga wala siya mabalaka sa nahitabo.
