Gipahibalo sa Department of Energy nga miabot na ang kinatibuk-ang 178 milyones ka litro sa diesel isip kabahin sa lakang sa gobyerno aron mapalig-on ang suplay sa lana taliwala sa nagpadayon nga panagbangi sa Middle East.
Sumala sa DOE, ang katapusang shipment maoy mikompleto sa upat ka kargamento ubos sa Executive Order No. 110 nga gipagawas ni Pang.Ferdinand Marcos Jr. aron mapanalipdan ang ekonomiya batok sa nagbag-o-bag-ong presyo sa lana sa global nga merkado.
Matod ni DOE Sec.Sharon Garin nga ang malampusong delivery, nga gidumalaan sa Philippine National Oil Company-Exploration Corporation, nagpakita sa dali nga aksyon sa gobyerno aron masiguro ang igo nga suplay sa fuel sa nasud.
Gipang-apod-apod ang mga shipment sa mga nag-unang hub sa Batangas, Subic, ug Davao aron masiguro nga adunay igo nga suplay sa nagkalain-laing bahin sa nasud.
Gibutyag pa sa DOE nga importante kining reserba aron masiguro ang padayon nga operasyon sa transportasyon, logistics, ug agrikultura.
