Nagbangga ang duha ka tren sa siyudad sa Bekasi, duol sa kaulohan sa Jakarta kagabii nga miresulta sa pagkamatay sa upat ka mga indibidwal.
Nahitabo ang aksidente sa Bekasi rail station diin nagbangga ang usa ka commuter line train ug usa ka long-distance train.
Gikumpirma sa railway operator sa Indonesia nga upat ang kumpirmadong patay samtang 38 pa ang gidala sa mga duol nga ospital.
Nagpasidaan mga otoridad nga posible pang mosaka ang gidaghanon sa mga biktima tungod kay nagpadayon pa ang rescue operations.
Sumala sa mga report, gibanabanaan nga unom hangtod pito ka tawo pa ang naipit sulod sa mga bagon, maong padayon ang pagputol sa rescue team sa mga puthaw nga parte sa tren aron maluwas ang uban pa.
Kalabotan usab niini, gipahigayon na usab sa Jakarta Police ang imbestigasyon aron mahibal-an ang hinungdan sa panagbangga.
Nakita usab ang dili moubos sa 20 ka ambulansya sa lugar sa insidente, samtang nagtabang ang mga rescuers gikan sa national disaster ug rescue agencies sa pag-evacuate sa mga pasahero.
Gilauman nga magpagawas pa og dugang detalye ang mga awtoridad sa mosunod nga mga oras kabahin sa maong insidente.
