Gidepensahan sa basketball community sa dakbayan sa Davao ang kasamtangang Phoenix guard nga si Francis “Ef” Escandor, kini human nga miguwa ang mga kritisismo sa pagkalakip niini sa propesyunal nga karera sa basketball sa PBA.
Nasayran nga pipila ka bulan na ang nakalabay adunay mga grupo ang mikwestyon sa katakos niini, ilabi na sa social media kabahin sa nakab-ot nga kalampusan ni Escandor sa natad sa basketball nga kini nagsugod dinhi sa dakbayan sa Davao.
Usa sa mga pagtawag sa mga kritiko ang “nepo baby,” samtang gitawag usab kini nga paspas sumala pa ang pag-abot niini sa maong estado sa iyahang karera sa basketball.
Apan sumala pa sa grupo nga misuporta kang Escandor, ang iyahang kalampusan karon nga naghatod og garbo sa dakbayan sa Davao usa ka pamatuod gumikan sa iyahang mga kakugi, determinasyon, pagpaningkamot, ug dedikasyon nga maoy naghatod kaniya sa naangkon niini nga kalampusan sa natad sa basketball.
Dili ikalimod nga si “Ef” Escandor gikan sa pamilya nga naghatag og maayung kalidad sa dulang basketball dinhi sa syudad ilabi na sa mga anaa pa sa high school nga lebel nga una na kining gisugdan sa mipanaw nga si Regino “Boy” Cua isip Regional Director sa Samahang Basketbol ng Pilipinas (SBP) Davao niadtong Agosto 2016 nga gipadayon sa iyahang amahan nga si Glenn Y. Escandor.
Gumikan sa maayong pagdumala sa iyahang amahan, nilambo ang katakos sa mga batan-ong players dinhi sa syudad nga nahimo pang sentro sa mga mata sa hilig sa dulang basketball sa nasudnong kampetisyon ug usa sa mga produkto mao si “Ef”.
Mas daghang organized ug sanctioned tournaments ang nahimong accessible, nga naghatag og tinuod nga plataporma sa mga aspiring athletes aron ma-develop ang ilahang abilidad.
Daghan ang makapamatuod nga niadtong panahona, nisaka ang kalidad sa high school basketball sa siyudad.
Sa Ateneo de Davao University (ADDU), gigamit ni Escandor ang tanang kahigayonan. Mipadula siya sa tanang liga basta ang Blue Knights naa pa sa kompetisyon.
Usahay dili sa tanang panahon maayo ang iyahang performance , apan gumikan sa didikasyon ug paningkamot ug kaandam nga makakat-on, miresulta kini sa kalig-on isip player.
Bisan pa sa limitado niining oras sa pipila ka dula, nagpabilin kining pasensyoso ug nakapukos sa tinguha nga mahimong garbo sa syudad pinaagi sa iyahanag abilidad.
Sumala pa sa grupo nga isip usa ka player, si Escandor nagpabilin nga mapahiubsanon, walay reklamo andam sa tanang disiplina hinungdan nga walay pagduha-duha nga nakab-ot ang kalampusab sa iyahang karera nga nahimong garbo sa dakbayan sa Davao.
