Gipasalig sa Bureau of Customs (BOC) nga normal pa ang pag-abot sa mga oil shipments sa nasud ug wala pay natala nga kanselasyon sa pagkakaron, sumala kang Commissioner Ariel Nepomuceno.
Bisan pa man niini, gikanayon sa opisyal nga kadaghanan sa mga shipment napadala na gikan sa Middle East sa wala pa magsugod ang tensyon.
Tungod kay ang biyahe molungtad og 14 hangtod 20 ka adlaw, posibleng makasinati ang merkado og kakulang sa suplay sa mga umaabot nga semana kung mosamot pa ang sitwasyon.
Tungod niini, nagtukod ang BOC og task force alang sa adlaw-adlaw nga monitoring sa mga gi-angkat nga mga produktong petrolyo aron masuta kung adunay kanselasyon o pagkalangan.
Sa pagkakaron, wala pay oil shipment nga nakansela, apan adunay ubang imported goods nga nalangan o nakansela na.
Gimando usab sa BOC ang pagpadali sa pagproseso ug pagpagawas sa mga oil shipment aron dali kini nga makaabot sa merkado.
