Mopasaka og motion for reconsideration ang kampo ni Senador Ronald “Bato” dela Rosa human gibasura sa Korte Suprema ang ilang bahin sa ilang petisyon nga may kalabotan sa temporary restraining order (TRO) batok sa posibleng pag-aresto ug pag-turn over kaniya ngadto sa kustodiya sa International Criminal Court (ICC).
Sumala pa sa iyang legal team, gamiton nila ang tanang legal remedies aron kuwestiyonon ang desisyon sa Korte Suprema ug ipasaka pag-usab ang ilang argumento sa kaso.Si Sen. Dela Rosa nag-atubang og reklamong crimes against humanity may kalabotan sa madugong kampanya kontra ilegal nga droga sa administrasyon ni kanhing Pangulong Rodrigo Duterte gikan 2016 hangtod 2022, diin siya pa ang hepe sa Philippine National Police.
Hugot nga gidepensahan sa senador ang mga alegasyon ug giingon nga wala siyay kalambigitan sa giingong extrajudicial killings.Nauna nang gikumpirma sa mga awtoridad nga gipangita ang senador aron ipatuman ang warrant of arrest nga gi-isyu sa ICC, bisan pa giingon nga wala umanoy legal nga gahum ang lokal nga ahensya sa pagpatuman sa foreign court warrant, sumala sa kampo ni Dela Rosa.
Sa kasamtangan, nagpadayon ang kontrobersiya human siya mipakita pag-usab human sa halos unom ka bulan nga pagpanago, ug gi-report nga mibiya sa Senado niadtong Mayo 14 sa kaadlawon.Hangtod karon, wala gihapon klaro sa publiko ang eksaktong nahimutangan sa senador samtang nagpadayon ang legal nga proseso.
