Gatusan ka mga Palestino ang naglinya sa taas nga pila sa gawas sa usa ka temporaryo nga soup kitchen sa Khan Younis, Gaza niadtong Lunes, Agosto 4, uban ang ilang walay sulod nga kaserola, naglaum nga makakuha og gamay’ng rasyon sa bugas o mga nilutong pagkaon.
Matod ni Hassan Abu Zayed, 62 anyos, nga gikan pa sayo sa buntag siya naghulat aron makakaon ang mga bata sa ilang pamilya. Daghan sa ilang kahimtang, sumala niya, ang wala gihapon makaabot og tabang.
Gibutyag sa health ministry sa Gaza nga lima pa ka tawo ang namatay sa miaging 24 ka oras tungod sa kagutom o malnutrisyon.
Ang bag-ong ihap nagdala sa total nga namatay tungod sa kagutom ngadto sa 180, lakip na ang 93 ka bata, sukad nagsugod ang gubat.
Sumala sa mga ahensiya sa U.N., dili igo ang mga food airdrops, ug kinahanglan paspasan nga tugotan sa Israel ang mas daghang ayuda nga makasulod sa Gaza pinaagi sa byahe sa yuta.
Ang COGAT, ahensiya sa militar sa Israel nga nagkoordinar sa ayuda, mibutyag nga kapin sa 23,000 ka toneladang humanitarian aid sa 1,200 ka truck ang nakasulod sa Gaza sa milabay’ng semana, apan gatusan pa niini ang wala pa madala sa mga aid distribution hubs sa U.N. ug uban pang internasyonal nga organisasyon.
