DAVAO CITY – Hingpit nang gilusad sa City Government of Davao ang Pasko Fiesta 2022 diin katorse ka mga events ang ipahigayon sulod sa usa ka bulan nga selebrasyon nga magpakita sa malipayon, masadyaon ug mabulukong pagsaulog sa Pasko diri sa dakbayan sa Davao.
Sugdan karong Disyembre 1 ang kasaulogan pinaagi sa Dan-ag Dabaw ug Pag-abli sa Pasko o ang Opening ug opsiyal nga pagpasiga sa Christmas Tree nga idungan sa 3D Wall Mapping o light show sa City Hall.
Ipahigayon sab ang Pasko Pahalipay ni Santa sa Magsaysay Park, People’s Park, Toril Park, Mintal Park, Calinan Park, ug Davao City Botanical Park gikan Disyembre 1 hangtud 25.
Samtang mag-atbang ang mga choral groups sa pagkanta sa mga sonata sa Pasko karong Koro sa Pasko Choral Singing Competition sa Disyembre 7; ug Panaygon sa Dabaw nga pangunahan sa mga choirs sa dakbayan karong Disyembre 2.
Makigsadya sab ang mga kaigsuonang lumad gikan Paquibato, Marilog, and Baguio Districts atol sa Pasko sa mga Lumad ug Badjao karong Disyembre 12 hangtud 17.
Ipahigayon sab karong Disyembre 16 ang Pasko Kumbira alang sa mga empleyado sa City Hall; ang Pasko Song Writing Contest sa may Bantawan Ampitheater sa Magsaysay Park; ug ang Siyam ka Kaadlawon kon Misa De Gallo sa sayo sa kabuntagon.
Elimination round sa Sayaw Pasko Fiesta Dance Competition karong Disyembre 17 ug Banda Dasig marching band competition karong Disyembre 18.
Mubisita sa dakbayan ang University of the Philippines Symphony Orchestra alang sa Pasko at Musika sa may USEP Sports and Cultural Center karong Disyembre 20; ug Grand Finals sa Sayaw sa Pasko Fiesta karong Disyembre 23.
Samtang adunay Misa Dabawenyo nga ipahigayon sa San Pedro Cathedral karong adlaw sa Pasko, Disyembre 25.
Gipaambit ang tanang mga Dabawenyo nga makigsadya karong Pasko Fiesta 2022.
via || Bombo LJ Florendo
