Posibleng ipatuman sa sunod semana ang pagsuspinde sa excise tax sa liquefied petroleum gas o LPG ug kerosene kung maaprobahan ni Pangulong Ferdinand Marcos Jr., sumala kang Finance Secretary Frederick Go.
Mipirma na si Go sa rekomendasyon sa Development Budget Coordination Committee alang sa pagsuspinde sa maong buwis, nga ipadala ngadto sa Office of the President alang sa pag-apruba.
Lauman nga maabot sa Palasyo ang rekomendasyon sulod sa usa o duha ka adlaw ug posible kining ipatuman sa sunod semana hangtod sa kataposan sa tuig.
Pinaagi sa full suspension sa excise tax, gibanabana nga mokunhod og ₱37 ang presyo sa 11-kilogram nga LPG tank, samtang ₱5.65 kada litro ang mahimong maminusan sa presyo sa kerosene.
Gisundan kini sa pagsaka sa presyo sa global oil ngadto sa kapin $100 nga tugbang sa ₱6,275.90 kada barrel kaniadtong sayong bahin sa Septiyembre tungod sa tensyon sa Middle East, nga mas taas sa $80 kada barrel nga threshold sa DBCC.
Samtang, wala gilakip sa plano ang diesel ug gasolina tungod sa mas taas nga excise tax niini.
Sumala sa kalihim, mas dako ang benepisyo sa mga adunahan kung tangtangon ang buwis sa diesel ug gasolina tungod kay mas daghan sila og konsumo niini.
Hinuon, gipaboran sa DBCC ang targeted subsidies alang sa mga sektor nga mas nanginahanglan og tabang.
Mokabat sa ₱12 bilyon kada bulan ang kawad-on sa kita sa gobyerno kung suspindihon usab ang excise tax sa diesel ug gasolina.
Apan, miingon si Go nga abli siya sa maong lakang kung adunay laing revenue-enhancement measure nga makapuli sa maong kantidad.
Kahinumdoman nga gitugotan na kaniadto ubos sa Executive Order No. 114 ang fuel tax relief, apan gitapos kini kaniadtong Hunyo 2026.
