Giangkon sa Philippine Psychiatric Association sa Mindanao nga adunay dako nga kakulangon sa mga certified psychiatrist dinhi sa Davao Region ug ubang bahin sa Mindanao.
Sumala pa sa asosasyon nga dinhi sa Mindanao adunay 40 ka mga full pledged psychiatrist lamang sulod sa 673 sa tibuok nasud.
Sumala pa sa grupo nga ang patient-to-psychiatrist ratio sa nasud, anaa lamang sa punto sengkentay dos kada 100,000 ka mga indibidwal, mas ubos kini kung itandi sa ideal nga ratio nga usa ka psychiatrist sa matag 50,000 ka mga indibidwal nga subay kini sa girekomenda sa World Health Organization.
Giangkon sab sa grupo nga nagkinahanglan gayud karon ug dugang eksperto sa maong problema aron nga mahatagan ug pagtagad ang maong isyu.
Samtang gikanayon sab sa Institute of Psychiatry and Behavioral Medicine-Southern Philippines Medical Center, nga nagkadaghan karon ang mga kabantan-onan nga adunay problema sa mental health diin 400 ngadto sa 500 ka mga pasyente gikan sa nagkadaiyang bahin sa Mindanao, nga kini gilangkuban sa Cotabato, Davao region,Bukidnon, ug Cagayan de Oro City nga nagkinahanglan ug propesyonal nga tabang sa nasampit nga institusyon.
Nasayran nga ang kasagarang problema sa mental health ang gilangkuban sa anxiety disorder ug depression ug nakita nga dakong hinungdan niini ang stress.
Namatikdan sa asosasyon nga nagkataas ang substance abuse, ilabi na sa iligal nga droga ug sa ilimnong makahubog.
Nanghinaot karon ang nasampit nga grupo nga kini ang mahatagan ug pagtagad sa hingtungdan nga ahensya sa kagamhanan ang maong problema nga giisip nga dako kini nga gisagubang karon sa nasud ilabi na sa mga tawo nga nakaangkon sa nasampit nga krisis sa kinabuhi ug kini nagkinahanglan ug pagtagad sa mental health professionals.
