Nanawagan si Vice President Sara Duterte sa publiko nga ipadayon ang panawagan alang sa pag-resign ni Pangulong Ferdinand “Bongbong” Marcos Jr., samtang iyang giakusahan ang kasamtangang administrasyon sa giingong pag-abuso sa gahum, korapsyon ug paggamit sa mga institusyon sa gobyerno batok sa mga kritiko.
Gibutyag ni Vice President Sara Duterte, sa iyang pakigpulong nga wala kuno’y ebidensya ang impeachment case batok kaniya ug gikuwestiyon ang Kongreso sa giingong paggamit sa gahum aron mangita lamang og mga ikapangatubang batok sa iyang kampo.
Gikuwestiyon usab niini, ang pagka priso ni kanhing House Speaker Martin Romualdez may kalabotan sa kontrobersyal nga flood control scandal, ug giakusahan ang administrasyon sa giingong pagpang-harass ug pagsulay sa pagpahilom sa mga senador ug mga kaalyado nga mosulti batok sa gobyerno.
Gipahayag ni Duterte nga dili siya mahimong magpabiling hilom samtang iyang nakita ang kalisod nga giatubang sa mga Pilipino, gikan sa epekto sa pagbaha hangtod sa pagsaka sa presyo sa mga palaliton.
Dugang pa niini, gihangyo sa bise presidente ang iyang mga supporters nga ipadayon ang ilang paglihok alang sa kaugmaon sa mosunod nga henerasyon.
Misupak usab dayon ang House prosecution panel sa maong panawagan sa bise presidente.
Sumala kang Lanao del Sur Representative Zia Alonto Adiong, posibleng adunay conflict of interest sa panawagan tungod kay si Duterte mismo ang mahimong unang makabenepisyo ug mopuli sa katungdanan kung mohawa sa pwesto ang Pangulo.
Gipalanog usab ni kanhing Surigao del Norte Representative Ace Barbers ang iyang pagsupak sa pahayag sa bise presidente, ug miingon nga bisan katungod ni Duterte ang pagpahayag sa iyang opinyon, kinahanglan gihapon niyang respetuhon ang due process ug ang mga legal nga proseso sa iyang mga kaso.
Sa pagkakaron, gipalangan sa Quezon City Regional Trial Court ang gikatakdang arraignment ni Duterte sa kasong grave threats samtang gihulat ang opisyal nga komento sa Department of Justice may kalabotan sa motion nga gipasa sa depensa.
Samtang, mibalibad usab ang legal counsel sa bise presidente nga ipadayag sa media ang eksaktong sulod sa maong motion samtang pending pa kini sa korte.
Kahinumduman nga ang arraignment mao ang proseso diin pormal nga ipahibalo sa akusado ang iyang giatubang nga kaso ug hatagan kini og higayon sa paghatag sa iyang plea atubangan sa korte.
