DAVAO CITY – Gipasalig ni Davao City Mayor Sara Duterte-Carpio ngadto sa publiko nga ang lokal nga panggamhanan adunay igong pondo isip tubag sa nasinatiang Coronavirus Disease (Covid-19) pandemic.
Sumala sa Mayor, aduna pay P96 million nga pondo ang City Government Disaster Risk Reduction and Management Fund (calamity fund).
Gani aduna pa’y wala nagamit ang siyudad nga pondo kaniadtong 2019 nga magsilbi isip buffer.
Ang sobra nga pondo mamahimong gamiton sa relief operations ngadto sa mga apektadong residente sa community quarantine ug sa gikatakdang pagpatuman sa enhanced community quarantine.
Sa kasamtangan, gigamit sumala pa sa syudad ang Local Peace and Order Fund ug Crisis Intervention Fund.
Sa kasamtangan, nagamit lamang sa dakbayan ang 30-percent Quick Response Fund (QRF) gikan sa five-percent calamity fund atol sa African Swine Fever (ASF) outbreak. Migahin sumala pa ang syudad og P52,295,200 sa 1,000 ka mga hog raisers sa Calinan nga naapektohan sa ASF.
