Gipirmahan na ni Davao City Mayor Sebastian Duterte ang Executive Order No. 15, Series of 2026 nga nagmugna sa ATO NA (Atong Taga-an og Oportunidad ang Nangandoy nga Atleta) Athletes’ Scholarship Program aron ilhon ug suportahan ang nagkadaghan nga kabatan-onang atleta sa dakbayan nga nagrepresentar sa Davao City sa regional ug national competitions.
Gipalig-on sa maong programa ang suporta sa mga student-athletes pinaagi sa paghatag og pinansyal nga tabang nga moabot hangtod ₱25,000 matag semester o sa pagsugod sa academic year, aron matabangan sila nga makapadayon sa ilang pag-eskwela samtang nagpauswag sa ilang abilidad sa sports.
Gisuta nga ang mga aplikante kinahanglan mga lehitimong residente sa Davao City sulod sa labing menos tulo ka tuig ug naka-enrol sa mga eskwelahan nga giila sa DepEd, CHED, ALS, o TESDA sa dakbayan.Gikinahanglan usab nga ang Junior ug Senior High School applicants graduates sa bisan public o private schools sa Davao City, samtang ang tertiary-level athletes kinahanglan adunay maayo nga athletic record ug mga nakab-ot nga kalampusan sa sports competitions.
Lakip usab sa kwalipikasyon nga ang kandidato kinahanglan nakarepresentar sa Davao City sa ilang sports ug aktibong nisalmot sa regional o national events sulod sa miaging duha ka tuig.
Gipatin-aw nga ang scholarship magpabilin nga epektibo hangtod makompleto ang academic program, basta matuman ang academic, athletic, ug behavioral requirements sa estudyante-atleta.
Ang kumpletong kopya sa EO No. 15, Series of 2026 anaa na karon alang sa publiko nga pagtan-aw.
