Ginaduso karon sa Department of Health o DOH ang total ban sa paggamit sa vape o e-cigarettes tungod sa hulga niini sa kahimsog sa publiko.
Matod ni Dr. Dominic Maddumba, tumong sa maong sugyot nga hingpit nga ibawal ang paggamit sa vape aron malikayan ang daotang epekto niini sa lawas.
Apan kon dili man matuman ang total ban, gisugyot sa DOH nga magpatuman na lamang og mas hugot nga regulasyon lakip ang pagtangtang sa nagkalainlaing flavor sa vape products.
Gipasabot ni Dr. Maddumba nga ang flavored vape makadani ilabi na sa kabatan-onan, busa mas maayo nga himuon na lamang kini nga parehas sa ordinaryong tobacco products.
Una nang nagpasidaan ang DOH nga ang paggamit sa vape ug uban pang tobacco products mahimong hinungdan sa nagkalainlaing sakit sama sa cardiovascular disease, cancer ug mga problema sa baga.
Padayon usab nga ginatun-an sa ahensya ang mga pamaagi aron maprotektahan ang kahimsog sa publiko, ilabi na sa mga kabatan-onan, batok sa peligro sa panigarilyo ug vaping.
