DAVAO CITY – Mitanyag karon si Davao City Mayor Inday Sara Duterte-Carpio ug tag-singkwenta mil ka pesos matag usa isip ganting salapi alang sa pagkasikop sa unom ka mga suspek nga milugos ug mipatay sa usa ka kwatro anyos nga batang babaye sa Paquibato Disitrict ning syudad niadtong milabay nga bulan lamang.
Sa pakighinabi sa Bombo Radyo, gikanayon ni Davao City Police Office (DCPO) Director Police Col. Allexander Tagum, gimanduan siya ni Mayor Inday nga ipahibalo ngadto sa publiko nga adunay gitagana nga reward money ang lokal nga kagamhanan alang sa mga makahatag ug tukmang impormasyon kalabot sa gikahimutangan sa unom ka mga suspek nga nalambigit sa pag-lugos ug pag-patay sa kwatro anyos nga batang babaye nga si Inrin Bocayla Manulugan, taga Sitio Mangani, Brgy. Tapak Paquibato District ning dakbayan niadtong Agosto 29, 2019.
Positibo nga giila sa mga witnesses ang 6 ka mga suspek kinsa nag-marijuana sumala pa niadtong panahuna nga sila STEVE ALLAN, JEROME BANGGAAN, JOREX MANLANGAN, MAYONADO CALIBAY, JOMAR CARIAMAN ug JOHN ONSILAG, pulos mga residente sa Brgy. Tapak Proper, Paquibato, apan karon nagtago-tago na human masuta nga gipangita na sila sa kapulisan.
Dugang pa ni Col. Tagum nga subay sa resulta sa forensic investigation ug pag-otopsiya sa PNP crime Laboratory XI, nakompirma nga gilugos ang biktima una gipatay.
