Nakasiguro si Pres. Ferdinand Marcos Jr. og mokabat sa ₱56.3 bilyong posibleng investments gikan sa dagkong Japanese firms atol sa iyang state visit sa Japan.
Ang maong investments naglangkob sa shipbuilding, advanced electronics manufacturing, semiconductor production, artificial intelligence o AI technologies ug green maritime industries nga gilauman usab makahatag og kapin 10,300 ka direktang ug dili direktang trabaho sa Philippines.
Lakip sa nakigkita kang PBBM ang mga opisyal sa Tsuneishi Group Corporation nga adunay plano sa pagpalapad sa ilang shipbuilding facility sa Pilipinas.
Gilauman nga pinaagi niini mahimong ika-upat nga pinakadakong shipbuilding nation sa kalibotan ang Pilipinas sunod sa China, Japan ug South Korea.
Nakigkita usab ang Pangulo sa mga executives sa Furukawa Electric Co. Ltd. nga nagpresentar sa plano alang sa advanced heat sink modules ug thermal management products nga suportado sa global electronics ug digital infrastructure applications.
Lakip usab sa gihisgutan ang pagpalapad sa operasyon sa Laguna Technopark aron mapadako ang produksyon sa high-performance heat sinks nga gigamit sa data center processing units sama sa CPUs ug GPUs tungod sa nagkadakong demand sa generative AI technologies.
Samtang naghisgot usab si PBBM uban sa Sumitomo Electric Industries may kalabutan sa ₱4.3 bilyong expansion project sa advanced electronics manufacturing.
Kabahin niini ang pagtukod og bag-ong pasilidad sa Cabuyao, Laguna pinaagi sa First Sumiden Circuits Inc., nga nailhang bugtong manufacturer sa flexible printed circuits sa nasud.
Sa laing bahin, gipadayag usab sa MinebeaMitsumi Inc. ang ilang ongoing ug planned investments sa semiconductor manufacturing, battery-related components alang sa hyperscale data centers ug advanced precision manufacturing sa Pilipinas.
Gilauman nga makatabang kini sa pagpalig-on sa partisipasyon sa Pilipinas sa global supply chain alang sa electric vehicles, AI-related electronics ug advanced telecommunications.
