DAVAO CITY – Gikumpirma sa Davao City Police Office nga mag-uyab ang duha ka mga biktima nga nakabsan sa kinabuhi niadtong adlawng Dominggo, Abril 21, sa Northpoint Condominium sa Daang Maharlika Highway, corner J.P. Laurel Avenue, Bajada, Davao City.
Sumala sa DCPO, gihinganlan na ang mga biktima nga sila Jeff Predas nga unang nakit-an sa ground floor sa maong gambalay bandang alas-5:24 sa buntag nga nagbuy-od ug dunay siyam ka samad dinunggaban sa kalawasan ug gituohang gihulog gikan sa taas nga andana sa maong building; ug si Jennifer Chavez nga nakit-an bandang alas-10:25 sa gabii nga napalgang naligo sa kaugalingong dugo sulod mismo sa room 319 sa maong condo.
Nasayran nga dungang nidayo ang mag-trato sa usa ka konsyerto sa Davao City una pa sila pulos nakabsan sa kinabuhi.
Nasayran nga walo na ka tuig nang mag-uyab ang mga biktima.
Dugang pa sa DCPO nga dunay duha (2) ka persons of interest ng gitudlo sa kapulisan nga ginaimbestigahan sanglit sila ang ulahing kontak sa duha ka mga biktima una pa ang krimen.
Gibutyag sab ni DCPO Spokesperson PCapt. Hazel Tuazon nga wala nag-andar ang mga CCTV niadtong tungura nga makahatag unta og mga detalye mahitungod sa insidente.
Posibleng crime of passion ang pagpatay sa mag-trato. Samtang, giadto na sa kabanay ni Jennifer Chavez nga gikan pa sa Bacoor, Cavite ang iyang patayng lawas nga gilagak na sa Angel Funeral Homes ning dakbayan.
via || Bombo LJF
