Misupak ang prosekusyon sa International Criminal Court sa mosyon sa kampo ni kanhing Pangulong Rodrigo Duterte nga limitahan sa 10,000 items ang mga ebidensya nga mahimong gamiton sa crimes against humanity case batok kaniya.
Sumala sa prosekusyon, may kalabotan ug makatarunganon ang gidaghanon sa mga ebidensya nga ilang gipadayag, tungod kay gikinahanglan kini sa pag-establisar sa mga partikular nga insidente ug sa mas lapad nga konteksto sa giingong mga krimen batok sa mga sibilyan.
Gisupak usab sa prosekusyon ang paghulagway sa depensa sa maong disclosure isip “dumping of documents,” ug mipahayag nga ang pagkunhod niini mahimong mosangpot sa pagtangtang sa mga materyal nga ebidensya nga importante sa paghusay sa kaso.
Sa mosyon sa depensa, ilang gipasabot nga misaka na ang evidence disclosure gikan sa 5,275 items atol sa confirmation phase ngadto sa kapin 62,000 items, lakip ang kapin 320,000 ka pahina sa mga dokumento ug kapin 1,000 ka audio-visual materials.
Gisugyot usab niini ang paghimo og bag-ong case record nga dili molapas sa 10,000 items aron mapadayon ang gikatakdang pagsugod sa trial sa Nobyembre 30, 2026.
Sa pagkakaron, nagpabiling nakatakda sa Nobyembre 30, 2026 ang pagsugod sa trial ni Duterte sa ICC sa The Hague, Netherlands, diin siya anaa sa kustodiya sukad Marso 2025. Ang maong mga mosyon kabahin sa mga isyu nga gisulbad sa Trial Chamber samtang nangandam ang korte alang sa pagtaral.
