Gitan-aw sa mga ekonomista nga posibleng magpadayon ang pagsaka sa interest rates sa Bangko Sentral ng Pilipinas tungod sa nagkagrabeng pressure sa inflation sa nasod, bisan pa sa paghinay sa economic growth.
Sa report sa Nomura, giklasipikar ang Pilipinas isip nasod sa Asya nga adunay taas nga inflation pressure, nga nakakuha og score nga 108. Mas taas kini kumpara sa Thailand nga 104.4, South Korea nga 102.3 ug Singapore nga 101.2.
Pagpasabot sa mga ekonomista nga nagkadaghan ang timailhan sa paglapad sa pagsaka sa presyo sa nagkadaiyang produkto ug serbisyo sa Asya, nga mahimong hinungdan sa dugang nga paghugot sa monetary policy sa mga sentral nga bangko.
Sa Pilipinas, mas lisod ang pagbalanse tali sa pagpugong sa inflation ug pagtabang sa ekonomiya tungod sa limitado nga pondo sa gobyerno alang sa dugang nga ayuda sa mga panimalay.
Miabot sa 7.2% ang inflation rate sa nasod kaniadtong Septiyembre, pinakataas sukad Marso 2023, tungod sa kadaot sa suplay sa pagkaon nga nalambigit sa dili maayong panahon ug sa pagsaka sa presyo sa lana.
Tulo na ka higayon nagpataas og 25-basis points ang BSP sa benchmark interest rate sukad Abril, hinungdan nga miabot kini sa lima ka porsyento.
Matud sa Nomura, gilauman nilang mopataas pa og 25 basis points ang BSP karong Oktubre, nga magdala sa interest rate ngadto sa 5.25 porsyento. Apan, nagpasidaan usab sila nga posibleng mas daghan pa ang sunod nga pagpataas kung magpadayon ang pressure sa presyo.
Gipahayag usab ni BSP Governor Eli Remolona Jr. nga andam ang sentral nga bangko sa pagpataas sa interest rates kutob sa gikinahanglan aron mabalik ang inflation sa target ug mapabiling kontrolado ang gipaabot nga pagsaka sa presyo.
Samtang, nagkanayon si Gareth Leather, senior Asia economist sa Capital Economics nga posibleng magpadayon ang rate hikes kung magpabiling taas ang presyo sa enerhiya hangtod sa sunod tuig, inubanan usab sa El Niño.
