Wala magplano ang Estados Unidos nga moatake sa Iran sa dili pa ang midterm elections sa Nobyembre 3, sumala sa gipahayag ni US President Donald Trump samtang nagpadayon ang mga panaghisgot tali sa Washington ug Tehran.
Matud ni Trump, adunay “productive discussions” tali sa US ug sa Islamic Republic of Iran, bisan wala siya maghatag og detalyadong impormasyon kon unsay nasabutan sa duha ka nasod.
Nagpadayon usab ang diplomatic efforts pinaagi sa Qatar ug ubang mga mediator aron makab-ot ang kasabutan nga motapos sa gubat. Apan, wala pa makab-ot ang pinal nga kasabutan tali sa Washington ug Tehran.
Bisan pa sa iyang pahayag nga walay pag-atake sa dili pa ang eleksyon, nagpabilin ang US blockade sa mga pantalan sa Iran. Gipadayon usab ni Trump ang iyang baroganan nga dili tugotan ang Iran nga makabaton og nuclear weapon.
Gikatakdang ipahigayon ang US midterm elections sa Nobyembre 3, diin pilion ang mga miyembro sa Kongreso. Ang pahayag ni Trump naghatag og timailhan nga nagpadayon ang diplomatic track, apan wala pa kini nagpasabot nga nahunong na ang gubat o adunay kasabotan alang sa kalinaw.
